BUTTERFLY EFFECT

கடவுளும் அவளும் கல் ஆனதால் காதலும் நானும்  பட்டாம்பூச்சி ஆகிறோம்.

தொப்புள் கொடியை அறுத்து எறிந்த பிறகு தன் நெஞ்சோடு அணைத்துக்கொள்கிற தாய், இறுதிவரை தன் பிள்ளைகளை மன இடுக்குகளில் அமர்த்தி நினைவுகளைப் காப்பது மாதிரி.. அந்த நிலம் தன் இடுப்பில் என் நினைவுகளை இப்போதும் சுமந்து கொண்டு தான் இருக்கும்.  மழைக்காடுகள் தான் நம் ஆன்மாவின் ஆடையை உடுத்திக்கொள்கிறது அவ்வப்போது.

இலையுதிர் கால மரங்களைப்போல் நாட்கள் உதிர்ந்து கொண்டே இருக்கும் வாழ்வில், ஞாபகங்களின் வழியே உயிர்த்தெழும் இறந்த கால வாழ்வின் சாட்சியாய் இருப்பது நீ மட்டுமே.. ! மழை பெய்து கொண்டிருக்கும் என் மனதின் தெருக்களில் உன் காலடித் தடங்கள் குளங்களைப் போல் இருக்கின்றது.

  என் தேவை, என் வாழ்வு என்று எல்லாம் தனியாகிப் போனதில் வருத்தமேதும் இல்லை என்றாலும், சற்றுநேரம் சலனமற்று இருக்கும் போதெல்லாம், உன் நினைவென்னும் குளத்தை சுற்றியே நடந்திருக்கிறேன் ஒரு துறவியைப் போல.  வண்ணத்துபூச்சியின் சிறகைப் போன்றவள் நீ..  நான் பூக்களை திறந்து வைத்திருக்கும் காட்டைப் போன்றவன்.  பறத்தலும் இருத்தலும் உன் விருப்பம் சார்ந்தது.  18:09:2015  பட்டாம்பூச்சிக் கதைகள்

யாசகப் பாத்திரமாகுமென்  உள்பெட்டி முழுவதும் உருண்டு விழும்  நாணய இசையென ஆறுதலாகுமுன் குறுஞ்செய்திகள் வருமோசை..! 10:05:2016

அது காதல் என்னை பெருங்கருணையோடு ஆசிர்வதித்திருந்த காலம்.  செல்மாகராமியின் கைகளை இறுகப் பிடித்துக் கொண்டு குன்னூர் புனித அந்தோனியார் தேவாலயத்தில், வாழும் ஜிப்ரான் போல் வேண்டிக் கொண்டே இருந்தேன்.  அந்த நாட்களில் தான் நந்தினி மீது விவரிக்கவே இயலாத ஆன்ம நட்பு வளர்ந்திருந்தது. அந்த நாட்களின் அனுபவ குறிப்புகள் தான் பட்டாம்பூச்சிக் கதைகள் ஆனது.  ஜூனியர் விகடனில் "காதல் படிக்கட்டுகள்" தொடராக வெளிவந்த போது எழுத்தின் மீதும் புத்தகங்கள் மீதும் இலக்கியத்தின் மீதும் அளவற்ற காதலுடன் இருந்தேன். இப்போதும் மனதில் சாலமன் பாப்பையாவின் வரிகள் சலசலத்து ஓடிக்கொண்டே இருக்கிறது. "பெருமழை பெய்யறப்போ மழைத்தண்ணி ஓஓ ன்னு அடிச்சுப் பொரண்டு பொறப்பட்டு வருமே, வழியில கிடக்குற அத்தனையும் அள்ளிக்கிட்டு உற்சாகமா கலங்கடிச்சுகிட்டு வருமே அது சின்ன வயசுச் சேட்டைக மாதிரி. அதுக்கு நிதானம் தெரியாது.  ஆனா, மழை வடிஞ்ச மறு நாளு அதே ஓடை கண்ணாடியைக் கரைச்சு ஊத்துன மாதிரி மெள்ள சலசலக்கும் பாருங்க அந்த நல்ல தண்ணி நடந்து வர்ற அழகு மாதிரி இருக்கணும்யா வாழ்க்கை!"